ಭಕ್ತಿಗೀತೆ ವೈಕುಂಠ ಏಕಾದಶಿಯ ಅಂಗವಾಗಿ

Google image source

ಯಾವ ಚಿಂತೆಯು ನಿನಗೆ ಶೇಷಶಯನನೇ

ಯಾವ ಚಿಂತೆಯು ನಿನಗೆ ಶೇಷಶಯನನೇ

ಮಂದಸ್ಮಿತದಲ್ಲಿಯೇ ಲೋಕ ನಡೆಸುವೆ ದೇವ //ಯಾವ//

ನಾರಾಯಣ ನಿನ್ನ ನಾಮದಲ್ಲಿಹ ಮಹಿಮೆ

ಪೇಳಿದರೆ ಸಾಲದು ಪಾಡಿ ಪೊಗಳುವೆ ದೇವ

ಸಿಂಧುಸುತೆ ಪತಿ ಎನ್ನ ಮುಂದೆಯೂ ಕಾಯುತಿರು

ಮಂದವಾಗಿಹ ಮತಿಯ ಚಂದದಿ ಹೊಳವಂತೆ ಮಾಡು

ಕಷ್ಟಗಳ ಕೊಡಬೇಡ ಎನಲಾರೆ ನಾ

ನಷ್ಟಗಳ ಸಹಿಸಿ ಹೆಜ್ಜೆಯಿಡುತಿರುವೆನು

ಕಿಚ್ಚನು ಕೊಡು ದೇವ ಹೊಟ್ಟೆಕಿಚ್ಚಿನ ಜನರೆದುರು

ಮೊಟ್ಟೆಯೊಡೆದ ಮರಿಯಂತೆ ಜಗವ ಕಾಣುತಿರುವೆ..

ಕೆಟ್ಟದು ನಡೆದಿದೆ ತಪ್ಪನು ಕ್ಷಮಿಸು

ಕೊಟ್ಟ ಮಾತನು ಉಳಿಸಿಕೊಳ್ಳದೆ ಮರುಗಿದೆನು

ತಪ್ಪನು ತಿದ್ದಿ ನಡೆಯಲವಕಾಶ ನೀಡು

ಒಪ್ಪತ್ತು ಉಪವಾಸ ಮಾಡಿ ಜಪಿಸುವೆ ದೇವ..

ಸಿಂಧು ಭಾರ್ಗವ, ಬೆಂಗಳೂರು